ЖАМКнын №14 мекемесинде энелер күнүнө карата «Сагындым апа өзүңдү, жылмайган тунук жүзүңдү» аттуу майрамдык иш-чара өткөрүлдү

Кыргыз Республикасынын Министрлер Кабинетине караштуу Жазаларды аткаруу мамлекеттик кызматынын (ЖАМК) №14 мекемесинде, мекеме башчысынын демилгеси жана ЖАМКнын төрагасынын колдоосу менен, Энелер күнүнө арналган «Сагындым апа өзүңдү, жылмайган тунук жүзүңдү» аттуу өзгөчө майрамдык иш-чара өткөрүлдү. Бул иш-чара жазык-аткаруу тутумунун тарыхында алгачкы жолу уюштурулуп жаткандыгы менен өзгөчөлөнөт.

Салтанаттуу иш-чарага ЖАМК төрагасынын биринчи орун басары Нурлан Сарчаев, Тарбиялык жана социалдык иштер башкы башкармалыгынын башчысы Нурдин Бердикожоев, Панфилов районунун акими Бекмаат Масаидов жана Кара-Балта шаарынын башкы Имам Хатиби Нурдан Омуралиев катышып, майрамдык маанайга күбө болушту.

Өз сөзундө Нурлан Сарчаев «Бейиш — эненикин таманында» деген терең маанилүү накыл сөздү эске салуу менен, эненин үй-бүлөдө жана коомдо ээлеген өзгөчө ордун белгиледи. Ошондой эле, келечек муундун туура калыптанышы жана коомдун өнүгүшү энелердин саламаттыгы жана руханий күчүнө байланыштуу экендигин баса белгиледи.

Майрамдык иш-чаранын жүрүшүндө мекемеде жазасын өтөп жаткан тарбиялануучулардын энелери атайын чакырылып, алар мекеменин ички тартиби жана шарттары менен таанышышты. Иш-чара концерттик программа менен коштолуп, обондуу ырлар, ыраазычылык сөздөр айтылып, эмоционалдуу маанай жаралды.

Бул иш-чара — жазык-аткаруу системасындагы тарбия ишмердүүлүгүнүн маанилүү багыты болуп эсептелет. Анын негизги максаттарынын бири — энелердин балдарына болгон ишенимин бекемдөө, ошондой эле жаза мөөнөтүн өтөп чыккандан кийин коомго ийгиликтүү кошууну көмөктөшүү.

Иш-чаранын максаты — тарбиялануучуларга эненин ыйыктыгын, түйшүктүү жана даңазалуу эмгегин терең түшүндүрүү, руханий жана моралдык тарбия берүү аркылуу алардын оң жолго түшүүсүнө шарт түзүү.

Пенитенциарные учреждения